Marianna Brand St 10A - Herinneringe

Vir menig een van ons was dit ‘n verskrikking om Boelina se pad te kruis en het ons maar probeer om draaie om haar te loop.

Ek was in st 7 en  mnr Gous het my kantoor toe gestuur met ‘n boodskap. Ek is met ‘n spoed teen die trappe af. Dit was so half ‘n gewoonte om as jy  onder kom die reling vas te vat en met so ‘n draai oor die slootjie te spring. So gemaak – en dis toe dat ek Boelina tref! Die pak boeke in haar hand het oor die aarde gesaai! Sy het my so deur die raas agter die nek beetgekry en so moes ek elke liewe boek optel! Nodeloos om te sê dat ek vir die res van my dae by WHS gesorg het dat ek nie in ‘n 100m radius van haar kom nie. 

Frau Bischoff se Duitse klasse bring baie herinneringe. Jy moes elle lange lyste Duitse idiome leer. As sy die klas instep, het sy dan die idioom begin, na een van haar slagoffers gewys en jy moes dan die res daarvan voltooi. Maak jy dit nie, is jy na die linkerkant van die klas verban wat as die “dumm und stumm reihe” bekend gestaan het. Daar was egter een persoon wat vir haar een te veel was - André Koorts. Die dag toe hy instap en vir haar se ”Frau do siehst aus wie ein blumchen zwiiichen bluhmen” (en dit terwyl daar net een blom op haar tafel was), het sy haar einde bereik en moes hy vir ‘n hele paar kere buite die deur staan. Terug in die klas was hy permanent aan die linkerkant van die klas , reg onder haar neus geplaas! Dit alles ter syde het ons dit gemaak en praat sommiges van ons vandag ‘n heel skaflike Duits.

Ons arme boerkinders het ook nie juis genade ontvang as dit by die “Ingels” kom nie. Hou in gedagte dat ons nie televisie gehad het nie en dat die skool die enigste blootstelling aan die rooitaal was. St 6 en soos verskrikte hase het ons “Mister Taylor”of beter bekend as Birdie getref. Die les het begin met “Morning class. Stand in the aisle” en dan spel hy die woord so letter vir letter en ons dreun agterna. Daarna was dit “Auwer Vaader”wat hy soms met ‘n faster faster onderbreek het. Toe kry hy dit in sy kop om die lange gebed een vir een te laat opsê. Oplossing? Die seuns plak die geskrewe een agter op die baadjie van die een wat voor hom staan vas en lees dit so deur skrefies oge. Die arme ongelukkiges wat voor in die klas gesit het, moes maar leer en sorg dat hulle die gebed ken!

Boel Dreyer is ‘n kleinneef van my pa en het onomwonde vir hom vertel al die familielede kan wiskunde doen en dat hy nie weet wat dit met my is nie. Pa reken toe hy moet maar nie die roede spaar nie. Ek kon om een of ander bizarre rede meetkunde doen maar met algebra het ek summier toegeslaan! As hy die klas instap het hy gevra “algebra of meetkunde?” As dit laasgenoemde was, het hy geblaf “Van der Merwe , Van der Poel - bord toe; Brand jy kan sit.“ As dit eersgenoemde was het ek voor die bord geland en het hy met die bordpasser se agterkant my agterstewe warm gemaak tot ek die som op die bord klaargemaak het. Of hy wiskunde in my ingefoeter het? Ek dink nie so nie want ek het toe ‘n taalonnie loop word!

Stories deur/oor die Lede

© WHS 1974 - 2021 | Links | Marianna Brand St 10A - Herinneringe

Website Design and Search Engine Optimisation (SEO) by ZAWebs Designs | Web Hosting by ZAWebs Hosting